'Ma Kea ‑ɩn ‑seie 'ʋn
59
Dafi 'a 'dʋ ‑ɛ ‑nɩa 'e 'dʋ ‑jeopoi klaa" 'a 'dʋsbɛ 'di ɛ, ‑ɩn ‑bo ɛ i ‑sa a mɛ ‑nɩ ɛɛ' blewlu. Nɔ" ‑ɛɛ 'di Sailɩ kpa nyʋ ‑wɛe ʋʋ ‑pian' Dafi 'a ‑gbu" ‑wɛe ‑bo ʋʋ kpʋn ɔ 'de ʋʋ 'jeɔ 'dba a.
2 'Ma Kea, ɛ ‑seie 'ʋn 'de 'ma tʋnyʋ 'kwa,
ɛ 'wlʋ 'ʋn o 'de nyʋ ‑nɩɛi" ‑ʋʋ ‑jea 'ʋn 'dba ‑pee.
3 Ɛ ji ɛ ‑je 'ʋn ‑seie 'de "kudbaʋn ‑nʋ 'kwa,
‑wɛe ɛ 'je 'ʋn 'pʋʋ‑ 'de nyʋ ‑ʋʋa ‑wla nyiɔɔ' nmɔ i 'kwa.
4 Ʋʋ ka, ʋʋa ‑a naa 'ʋn ‑sɔn,
'diwɔnyniiʋn ‑pin' 'ʋn 'ɛ,
'de ‑mɛ 'ka mɔ 'ɩn se dɛjrɛ' nʋ.
'De ‑mɛ 'ka 'ɩn se dɛsaʋn jrɛ' nʋ Tʋ "bo.
5 'De ‑mɛ 'ɩn se "jrii nynii dɛjrɛ' nʋ,
'kaa ʋʋa pleɛ 'ʋn 'dei, ʋʋa nmaeɛ dɩ.
Ɛ sɔn 'ʋn, ɛ ji, ɛ ‑gbʋn 'e mu.
6 Tʋ "bo, 'blʋa ke jaʋn 'a Kea,
Israɛ ‑kɔʋn 'a Kea,
ɛ sɔn 'ʋn ɛ po 'ʋn sʋn o
‑wɛe nyʋ ‑sea' ‑mɔ Kea juuo ‑ɩn ‑je ʋʋpʋ‑ 'kle "kpei ja‑,
dɛsaʋnʋʋ ‑nʋ ‑ɩn ‑bo ʋʋpʋ‑ 'a wɛe 'jeɛ. ‑Te' ‑kwlʋ.
7 ‑Bo kwie kpʋn ɛ,
ʋʋa jiɛ de ‑wɛe ʋʋa ‑kuuan' ka
‑gbe' a ‑kuuan ‑wɛe ʋʋa ple ‑kwlɔ "kpei.
8 Dɩsaɩn 'a 'sʋ ‑a jii 'de ʋʋ 'wɔn,
wlu ‑wlʋa 'de ʋʋ 'wɔn ‑kɔ' ‑cnɩ.
Ʋʋa wlu' 'de ba ‑pee ʋʋ 'na nyɔ ‑bɛɛ' ‑aa wlu 'mii 'wɔan ‑a?
9 'Kaa ‑mɔ ɛ, Tʋ "bo, ‑ma wlaa ʋʋpʋ‑ 'mɛ,
‑wɛe ‑ma wlaa nyʋ ‑sea' Kea ju o‑.
10 Ɛmɛ Kea ɛmɛ ‑nɩ 'ma 'kpɩ, 'ma "jriɛ nɩɛ ‑ʋn ‑pʋn",
ɛmɛ ‑nɩ 'ma sro' 'wlaaɩn'.
11 'Ma Kea ‑ɛ ‑kma 'ma ‑tɩ' ɛ, ɛɛ muɛ 'ʋn o jia',
ɛɛ muɛ nʋa' 'ɩn 'je 'ma tʋnyʋ "jriɛ 'jee tʋ 'je ʋʋ du.
12 Ɛ 'bo ʋʋpʋ‑ i ‑sa a kaan ke,
‑wɛe nyiɔpʋ‑ je ʋʋpʋ‑ o "mae‑
'kaa 'de ɛɛ' "ikmaa' 'ʋn ɛ ‑bluua ʋʋpʋ‑,
‑mɔ ‑nɩa ‑aa "i kaan dɛ Tʋ "bo.
13 Dɛsaʋn 'a 'sʋ ‑a jii 'de ʋʋ wɔn 'di,
ʋʋ bluɛ 'de ʋʋa' ‑cɛ" 'ɛ ‑cɛi" 'bɛɛa' 'a ‑sebɩɛ 'di,
'de ʋʋa' sɩ dia' ke ʋʋa' nyʋ ‑soo' o poa' 'a ‑tɩ' 'ʋn.
14 ‑Ɩn ‑sa ʋʋpʋ‑ i 'de ‑ma 'cɛn jri 'di,
‑ɩn ‑sa ʋʋpʋ‑ i ʋʋ 'bo 'kmʋ nɩɛ ‑wɛe dɛ ‑mua' 'de 'blʋa 'a "tiin ɛ,
nyʋ 'jeɛ juuo ka Sakɔbʋ Kea nɩa 'beɔ ɛ. ‑Te' ‑kwlʋ.
15 ‑Bo kwie kpʋn ɛ, ʋʋa jiɛ de
‑wɛe ʋʋa ‑kuuan ka ‑gbe' a ‑kuuan ‑wɛe ʋʋa ple ‑kwlɔ "kpei.
16 Ʋʋa ‑pɔn nyʋ ʋʋ 'jea kpʋn i 'de ‑ta 'oo ‑ta ‑wee'‑,
‑bo ʋʋ seɛ 'jeɛ, mʋʋa‑ 'bo ‑sɔn' ɔ ‑sɩɩn ʋʋpʋ‑.
17 'De 'mɔ ɛ, 'ma muɛ blea' 'ɩn 'je ‑ma "ikmatɩ‑ 'tmʋ.
'Ma muɛ ‑ʋn 'nynɩ ‑gbaa' ‑bo ‑sɔn ɔ sea ‑sɩn' ɛ,
'ma muɛ ‑ma 'diwɔnmɔtɩ‑ 'tmʋa.
Dɛ ‑nʋɛ ɛmɛ ‑nɩ ‑mɔ ‑nɩ 'ma 'kwla pa na'
‑bo 'ɩn nɩ 'e 'kle 'di mɔ 'de ɛ.
18 'Ma i fuoi‑, 'ɩn nɩɛ "i 'ɩn 'je ‑ma 'nynɩ "i 'bɛɛ‑ 'de blewlu 'di,
dɛ ‑nʋɛ ‑mɔ ‑nɩ 'ma 'kwla pa na', kɩɩn Tʋ "bo,
ɛ nɩ Kea ‑ɛ ‑kma 'ma ‑tɩ' ‑o.